Ish-futbollisti i Barcelonës, Lyonit, Lillet, Lecces dhe ish-përfaqësuesi kombëtares së Francës, Samuel Umtiti ka njoftuar edhe zyrtarisht pensionimin nga futbolli në moshën 31-vjeçare.

Umtiti përmes një njoftimi në rrjetin social Instagram njoftoi se po tërhiqet nga futbollisti profesionist pas një karriere me plot ulje-ngritje, shkruan Arbresh.info.

Karrierën e tij e nisi te Lyon, ku u rrit si lojtar, para se të transferohej te Barcelona në vitin 2016.

Me Barcelonën fitoi disa trofe, përfshirë La Liga dhe Kupën e Mbretit.

Kulminacioni i karrierës së tij ishte me Francën, ku u shpall kampion bote në Kupën e Botës 2018, duke shënuar edhe gol në gjysmëfinale ndaj Belgjikës.

Por lëndimet e shpeshta ia pamundësuan francezit që të vazhdojë karrierën e tij në mënyrën më të mirë të mundshme.

Në vitin 2022 ai u transferua drejt Lecces nga Barcelona, teksa pas një sezoni u rikthye në Francë tek Lille për të vazhduar edhe për një sezon tjetër.

Tash e një vit ai nuk është pjesë aktive shkak i një lëndimi të rëndë që pësoi, kjo ka bërë që edhe t’i thotë lamtumirë futbollit në këtë moshë./Arbresh.info